}{معنى الحب بجد}{

السلام عليكم
النهاردة أنا عايز أتكلم علي الحب, بس بمنظار تاني و رؤيا تانيه, عايز أتكلم في شيء الناس مش بتفهمه صح. هخلي الموضوع في صوره تاج أنا أول واحد هجاوب عليه و همرروا للناس كلها.. و لو سمحتوا, الموضوع مش محرج ولا حاجة, كلنا حبينا و بنحب و هنفضل نحب, بلاش نعتبر الموضوع شيء عيب نتكلم فيه, و ان شاء الله التاج هيبقي سهل ومافيهوش اي سؤال محرج, و السؤال اللي ماتحبش تجاوب عليه أكتب فيه ( مسأله شخصية ) و أنا هفهم..

___________________________

مين اول شخص عرفت أنك بتحبه, يعني انك نفسك يبقي معاك علي طول, و نفسك تبقي مثله؟؟و ليه؟
أصغير خيالني, و كنت بحبه علشان كان بيمثلي الشاب المحترم الناجح

أمتي أول مرة قلبك اتحرك ناحية بنت (للولاد), او ولد (للبنات)؟؟, يا ريت تحكي عن المرة ديه شوية
أول مرة كنت في ثالثة ابتدائي, و كانت حاجة عيالي كده بس لذيذة لأنها كانت أول تجربة, طبعا مكانش كامل فيها المعاني الاساسية للحب بس كانت تجربة جميلة و طفوليه, كل ما أفتكرها أفتكر أغنية محمد منير بتاعت ( جيرة و عشرة ) يا ريت تسمعوها

امتي أول مرة تشوف اثنين بيحبوا بعض, و قلت هو ده الحب بجد؟
من ثلاث سنين أو حاجة كان عندي 15 سنة, كنت قاعد مع عيال اصحابي في جنينة كده, و كانت حوالي الساعة 8 بالليل, و كان فيه اثنين عواجيز ست و راجل سنهم الاثنين يتعدي الـ60 قاعدين يضحكوا و يهزروا و سمعت طراطيش كلام كده انهم بيتكلموا علي اولادهم اللي اتجوزوا و أحفادهم و مواقفهم الطريفة, و ساعتها قلت اني لو وصلت لكده مع واحدة يبقي كده أنا حبيتها بجد.

كام واحدة حبيتها في حياتك ( للولاد ), و كام واحد حبتيه في حياتك ( للبنات ), و القصد حب مش شرط بجد؟
ثمانيه فاكرهم
و اثنين ناسيهم

كام شخص منهم كان نفسك تكمل معاه حياتك؟
كلهم

طيب و امتي عرفت مين حبيته بجد و مين لأ؟
قريب قوي

ايه مقاييس الحب الحقيقي بالنسبه ليك/ليكي؟
أولا: تتقي الله مع اللي بتحبه, يعني كل لحظة أنت معاه تكون عارف أن ربنا شايفكم
ثانيا: يكون هدفك الأساسي شريف, يعني مش مجرد وقت و بيعدي, لأ يكون الهدف بعد كده أسرة هتتكون و مسئوليات
ثالثا: تحميها حتي من نفسك, يعني تبعد عنها علي قد ما تقدر و تجاهد نفسك في كده, و قصدي البعد يعني عن اللمس
رابعا: تراعي نظرة الناس ليها و هي معاك, يعني مين هيقول ايه, يعني السمعة
خامسا: تكون مصلحتها رقم واحد بالنسبة لك
سادسا: انك تراعي ان ليها كرامة و ليها أحلام و ليها مخاوف, يعني ماتضغطش عليها في حاجة تمس دول الا لو غلط او حرام
ثامنا: ان يكون موضوعكم رسمي لاقرب درجه ممكنه, يعني أهلها يكون عندهم علم ولو بأبسط الأمور

هل الحب بيدوم علي طول؟
لأ, و لأ, و لأ, الحب كمشاعر لا تدوم للأبد, بتروح و تيجي في أمور الدنيا, لأن الدنيا مشاغل و لو الانسان سمح لمشاعرة تسيطر عليه هيكون مصيرة الفشل في حاجات كثير, انما لو بقي الشخص اللي انت بتحبه بقي شيء اساسي في حياتك, يبقي ان شاء الله العلاقة هتنجح.
و أساسي يعني فرد في عقلك, زي امك و ابوك و اخواتك و أهلك, مش شرط انك تفضل 24 ساعة بتفكر فيهم و هيمان في حبهم, انما أمرهم يهمك و حبك بيظهر في معاملتك معاهم و مواقفك تجاههم, يعني عملي.

في نظرك, يعني ايه اتنين بيحبوا بعض بس مش بجد؟
يعني مقضينها من الاخر, خروجات و ضحك و لعب و شوية منظرة, و سهتنه, و قبل ما تنامي كلميني, و قبل ما تصحي رني عليا و الكلام الفاضي ده.... ده كله مظاهر كدابه, أو حب مشاعر هينتهي في أي لحظة, لأن المشاعر زي ما قولت بتتغير.

للمتزوجين فقط؟انت لسة بتحب مراتك؟
طيب فاكر واحدة من اللي قبلها ولا خلاص؟
انا لسة مش متجوز

ايه مفهوم الغيرة عندك؟
الغيرة هي احساس طبيعي ربنا خلقة في الانسان, خلق الانسان ليغار علي أهل بيته

ايه مواصفقات البنت/الولد(للبنات) اللي انت نفسك تكمل حياتك معاها؟
متدينة بعيدة كل البعد عن التشدد و التعصب, وقورة في مواقف الجد, شقية جدا, عندها حياء حتي مني, مثقفة و ليها اهتمامات, مش نكدية, محاورة جيده, و تقدر تحل محلي في أي وقت, مدبرة, جميلة و بتاخد بالها من نفسها, صادقة جدا.

و هل لاقيت ده موجود في البنت اللي بتحبها حاليا؟
أو هل لاقيت ده موجود عامه؟
مش كل الصفات موجودة فيها, انما اكثرها و أهمها, و الباقي مع الوقت هيتوجد..ان شاء الله

هل الحب حرام؟, قصدي الحب يعني بنت أو ولد بتحبه و هو بيحبك و علي اتصال و علم بالحب اللي بينكم
لأ مش حرام لو بينك و بينها حدود الدين, يعني مفيش لمس ولا همس ولا الكلام الفاضي ده

صف نفسك كمحب في كلمه او جمله صغيرة
عملي

أرجو منكم الاجابه علي الاسئلة ديه, اما علي مدوناتكم او اللي معندوش مدونه يجاوب في تعليق علي الموضوع ده عندي في المدونة.
و التاج مفتوح للكل, مش شرط للي عملتلهم دعوة.

ملحوظة, أرجو من كل اللي يجاوب علي التاج عنده في المدونة, يكتبلي تعليق عندي فيه رابط التاج علي مدونته

الــتــــــــــاج
Copy and Paste
_________

مين اول شخص عرفت أنك بتحبه, يعني انك نفسك يبقي معاك علي طول, و نفسك تبقي مثله؟؟و ليه؟

أمتي أول مرة قلبك اتحرك ناحية بنت (للولاد), او ولد (للبنات)؟؟, يا ريت تحكي عن المرة ديه شوية

امتي أول مرة تشوف اثنين بيحبوا بعض, و قلت هو ده الحب بجد؟

كام واحدة حبيتها في حياتك ( للولاد ), و كام واحد حبتيه في حياتك ( للبنات ), و القصد حب مش شرط بجد؟

كام شخص منهم كان نفسك تكمل معاه حياتك؟

طيب و امتي عرفت مين حبيته بجد و مين لأ؟

ايه مقاييس الحب الحقيقي بالنسبه ليك/ليكي؟

هل الحب بيدوم علي طول؟

في نظرك, يعني ايه اتنين بيحبوا بعض بس مش بجد؟

للمتزوجين فقط؟انت لسة بتحب مراتك؟ طيب فاكر واحدة من اللي قبلها ولا خلاص؟

ايه مفهوم الغيرة عندك؟

ايه مواصفقات البنت/الولد(للبنات) اللي انت نفسك تكمل حياتك معاها؟

و هل لاقيت ده موجود في البنت اللي بتحبها حاليا؟
أو هل لاقيت ده موجود عامه؟

هل الحب حرام؟, قصدي الحب يعني بنت أو ولد بتحبه و هو بيحبك و علي اتصال و علم بالحب اللي بينكم

صف نفسك كمحب في كلمه او جمله صغيرة

______________________

مين اول شخص عرفت أنك بتحبه, يعني انك نفسك يبقي معاك علي طول, و نفسك تبقي مثله؟؟و ليه؟اول شخص بالظبط مش فاكرة بس اللي في تفكيري دلوقتي هوة الكاتب عبد الوهاب مطاوع كان ولا زال بالنسبالي مثل اعلي في حاجات كتير قوي وانا بجد بحبو جدا واتعلمت منو حاجات كتيرةونفسي اكون زيو اكيد .

أمتي أول مرة قلبك اتحرك ناحية بنت (للولاد), او ولد (للبنات)؟؟, يا ريت تحكي عن المرة ديه شوية

من زمان قوي ابتدائي علي ما افتكر وكنت باحس لما بشوفو اني مبسوطة.
امتي أول مرة تشوف اثنين بيحبوا بعض, و قلت هو ده الحب بجد؟

في كتير اعرفهم بيحبوا بعض بجد متجوزين وغير متجوزين بس اول حد اول حد ابويا وامي

كام واحدة حبيتها في حياتك ( للولاد ), و كام واحد حبتيه في حياتك ( للبنات ), و القصد حب مش شرط بجد؟
كتييييييير قوي انا تقريباوانا صغيرة كنت كل ما اشوف حد احبو

كام شخص منهم كان نفسك تكمل معاه حياتك؟
ساعتها كان كلهم

طيب و امتي عرفت مين حبيته بجد و مين لأ؟
مين لا عرفت من زمان لان في حب طفولي دا اكيد ماكنش بجد بس مين حبيتو لسة مااتاكدتش قوي لان الموضوع مش سهل

ايه مقاييس الحب الحقيقي بالنسبه ليك/ليكي؟
اول حاجة اننا نكون بنراعي ربنا في الحب داوبعد كدة يكون هدف الحب دا اكيد الارتباط الرسمي وتكوين اسرةوكلمة حب معناها كبير قوي يعني احترام وحد يخاف عليك بجد يعني حد يقدر يفهمك وانت تفهمو ويحس بيك وحاجات تانية كتير مالهاش اخر

هل الحب بيدوم علي طول؟
الحب موجود بس مش في كل وقت مش هنفضل نحب طول الوقت بس اكيد اللي بحبو بيبقي في بال علي طول ومتهيالي لكل حاجة وقت

في نظرك, يعني ايه اتنين بيحبوا بعض بس مش بجد؟
يعني بيتسلوا وبيضحكوا علي نفسهم وفاكرين الحب بالكلام وبس

للمتزوجين فقط؟انت لسة بتحب مراتك؟ طيب فاكر واحدة من اللي قبلها ولا خلاص؟
لسة ماحصليش الشرف

ايه مفهوم الغيرة عندك؟
الغيرة دي احساس طبيعي بس المهم ان يكون ليها حدود

ايه مواصفقات البنت/الولد(للبنات) اللي انت نفسك تكمل حياتك معاها؟
اول حاجة يكون علاقته بربنا كويسة بالمعني الصح مش التزمت ويكون بيحبني ويحترمني ويخاف عليا ويكون عندو هدف في حياته ويكون طموح ومثقف ويقدر يفهمني صح والمسائل المادية مش بتفرق معايا كتير

و هل لاقيت ده موجود في البنت اللي بتحبها حاليا؟
أو هل لاقيت ده موجود عامه؟
اكيد دا موجود بس متهيالي مش شرط يكون كلو موجود في شخص واحد

هل الحب حرام؟, قصدي الحب يعني بنت أو ولد بتحبه و هو بيحبك و علي اتصال و علم بالحب اللي بينكم

الحب اكيد مش حرام بس لو كان حب بجد وفي حدود الدين

صف نفسك كمحب في كلمه او جمله صغيرة

لما احب احب بجد مش بالكلام وبس واعمل اي حاجة مهما كانت علشان اللي بحبو

نورا______________________

مين اول شخص عرفت أنك بتحبه, يعني انك نفسك يبقي معاك علي طول, و نفسك تبقي مثله؟؟و ليه؟
ما فيش!!!!!!!!!

أمتي أول مرة قلبك اتحرك ناحية بنت (للولاد), او ولد (للبنات)؟؟, يا ريت تحكي عن المرة ديه شوية
في ابتدائي انا كنت بحبه و هوا كمان..بس طبعا كله ذهب مع الرياح يعني شغل اطفال بقي

امتي أول مرة تشوف اثنين بيحبوا بعض, و قلت هو ده الحب بجد؟
خالي و مراته..عاشوا قصة حب جميلة اوي

كام واحدة حبيتها في حياتك ( للولاد ), و كام واحد حبتيه في حياتك ( للبنات ), و القصد حب مش شرط بجد؟
ممكن اعجبت بكتيير اووي
و لكن مرة واحدة بس حبيت فيها بجد

كام شخص منهم كان نفسك تكمل معاه حياتك؟
هوا الشخص ده بس كله قسمة و نصيب..

طيب و امتي عرفت مين حبيته بجد و مين لأ؟
برده هوا الاخ ده حبيته بجد..

ايه مقاييس الحب الحقيقي بالنسبه ليك/ليكي؟
انه يكون حب في النور يعني مش في السر,يعني بعلم الاهل

هل الحب بيدوم علي طول؟
اه بيدوم لوكان مبني علي اسس قوية و دينية و في جدية من الاول..و مهما حصل مشاكل هيدوم الحب

في نظرك, يعني ايه اتنين بيحبوا بعض بس مش بجد؟
يعني قلة ادب و تسلية و لعب و تضيع وقت و طبعا ضياع سمعة البنت نهائيا

للمتزوجين فقط؟انت لسة بتحب مراتك؟ طيب فاكر واحدة من اللي قبلها ولا خلاص؟
انا مش متزوجة, و هرد عليك بعد ماتجوز انشاء الله ,فول كده بعد 5 او 6 سنين و حط عليهم 4 سنين بعد الجواز علشان اقدر اقولك بالظبت.

ايه مفهوم الغيرة عندك؟
امر طبيعي بين كل حبيبين و لكن ان تكون غيرة صحية و ليست مرضية اي متكونش غيرة علي الفاضي و المليان, لازم يكون في عقل شوية لان لو مفيش داع الحب

ايه مواصفقات البنت/الولد(للبنات) اللي انت نفسك تكمل حياتك معاها؟
1-متدين و يتقي الله
2-اخلاق عالية م مستواه الاجتماعي و المادي كويس
3-متفاهم و عاقل و جاد و في نفس الوقت لذيذ و لطيف
4-يكون بيحبني اوي و يحافظ عليا
5-قادر علي تحمل المسؤولية
6-شكله مقبول كويس يعني و مهندم
7-مش عصبي و يكون طيب
ملحوظة: دا مش بالترتيب فكلة بالنسبالي رقم 1

و هل لاقيت ده موجود في البنت اللي بتحبها حاليا؟
أو هل لاقيت ده موجود عامه؟
نعم لقيته في الشخص ده معادا حاجات بسيطة, و عامة نادرا متلاقي حد كده اليوميين دوول

هل الحب حرام؟, قصدي الحب يعني بنت أو ولد بتحبه و هو بيحبك و علي اتصال و علم بالحب اللي بينكم؟
لأ مش حرام لو كان يرضي ربنا

صف نفسك كمحب في كلمه او جمله صغيرة؟

انا لسه مافيش حاجة حاليا..لكن اصف تفسي في كلمة و هي (عاقلة)ر

[/size]